Дзень здароўя “Зімовыя забавы” ў выхаванцаў рознаўзроставай групы інтэграванага навучання і выхавання быў насычаны разнастайнай актыўнай дзейнасцю, накіраванай на фарміраванне здаровага ладу жыцця.
У Асінаўшчызненскай пачатковай школе прайшоў Дзень здароўя “Зімовыя забавы”
Образование
22.01.2024
Дзень пачаўся з бадзёрай музычнай ранішняй гімнастыкі. Пасля смачнага і карыснага сняданку выхаванцаў чакала кола загадак “Што зіма раскажа нам?”. Пазней дашкольнікі актыўна разважалі над пытаннем доктара Айбаліта: “Дзе хаваецца здароўе?”. Таксама ў групе праводзіліся розныя гульні: “Адгадай, хто я” пра зімовыя забавы і віды спорту, “Шкода і карысць для арганізма”, “Хітрыя вітамінкі”. Не забылі згадаць пра тое, што трэба рабіць пры абмарожванні.
Пры дапамозе даследавання “Што нам трэба, каб сабрацца на прагулку?” хлопчыкі і дзяўчынкі ўзгадалі найпрасцейшыя правілы захавання і ўмацавання здароўя; замацавалі ўяўленне пра тое, што заўсёды трэба апранацца ў залежнасці ад надвор’я.
Сапраўдным святам для нашых выхаванцаў стала спартыўная забава на свежым паветры, падчас якой дзеці прынялі ўдзел у эстафетах “Гонкі на санках”, “Пападзі снежкай у мішэнь”, “Пераправа”, “Перанясі снежны камячок”, а таксама гулялі ў гульні “Снег, мяцеліца і гурбы”, “Два маразы”.
Падчас Дня здароўя дзеці атрымалі зарад бадзёрасці і добрага настрою, шмат карысных і неабходных ведаў.
Дзень здароўя “Зімовыя забавы” паспрыяў умацаванню фізічнага і псіхічнага здароўя, фарміраванню каштоўнага стаўлення да здаровага ладу жыцця ў дашкольнікаў. Гэты дзень прайшоў з карысцю для здароўя, бо нездарма кажуць: “У здаровым целе - здаровы дух!”
Гонка на санках.
Дзе хаваецца здароўе.
Пераправа.
Алена Біслюк,
выхавальнік дашкольнай адукацыі Асінаўшчызненскай пачатковай школы
