Хвароба прыйшла неяк нечакана: пачала дзервянець сківіца, нібы абцугамі, сціснула ўсю галаву. Я выпіла нейкай “мікстуры” і цярпела боль амаль увесь дзень, але гадзін у пяць вечара зразумела: патрэбна дапамога ўрача. Патэлефанавала дачцэ ў Мінск. Дачка адразу: “Мама, я еду, збірайся…”.
Адданы сваёй справе
Общество
05.11.2023
Адправіліся мы з ёй у смаргонскую стаматалогію. Было ўжо амаль сем вечара. На здзіўленне, такім познім часам сустрэлі загадчыка Мацвея Стэфанавіча Ляшука. Глянуўшы на мой змарнелы выгляд, ён адразу прапанаваў сесці ў крэсла. Паклікаў медсястру. Упэўнена, рашуча, прафесіянальна вырваў тры зубы – пад імі быў абсцэс. Пасля адправіў мяне на кушэтку паляжаць. Увесь час побач са мной знаходзілася медсястра, сачыла за ціскам, які перавысіў пазнакі 180 на 120. Мацвей Стэфанавіч таксама цікавіўся станам майго здароўя…
Я ў чарговы раз пераканалася, што маю справу з цудоўным доктарам. Яго галоўныя якасці - адказнасць перад хворымі, любоў да сваёй прафесіі, да людзей, праніклівая ўважлівасць да стану кожнага хворага, нягледзячы на яго ўзрост, пасаду, знешні выгляд. Для яго існуе адзіны паказчык – хворы, якога трэба ратаваць.
Пры мне ў той позні вечар прыйшлі яшчэ тры пацыенты. Без усякай нервознасці, злосці, са спакойным тварам Мацвей Стэфанавіч усім аказаў дапамогу. Вось такім і павінен быць сапраўдны доктар.
Сваё рабочае месца ён не памяняў на камерцыйныя медыцынскія цэнтры, набывае вопыт, майстэрства і перадае назапашанае іншым калегам. Таму і калектыў у стаматалогіі – цудоўны.
Мудры Сакрат сцвярджаў: “Усе прафесіі ад людзей, а толькі тры ад Бога: судзіць, лячыць, вучыць”. Мацвей Стэфанавіч – урач ад Бога. Прыемна, што ў нашым раёне ёсць такі доктар. Хай яго жыццё будзе напоўнена здароўем і падзякамі добразычлівых пацыентаў.
Алена СТРАХ, в. Баярск.
