У Солах вясну гукалі

Абрадавае свята “Гуканне вясны” правялі ў Сольскіх яслях-садзе. У абрадзе галоўнае весяліцца, спяваць ды радавацца жыццю.

Зіма адступае, а каб Вясна прыйшла хутчэй, яе трэба гукаць. Мы распачалі свята гукальнай песняй “Жавароначкі прыляціце”, а затым усе разам вадзілі карагоды “Сонейка цёплае, сонейка добрае”, гралі на дзіцячых музычных інструментах, гулялі ў беларускія народныя гульні “Грак”, “Ручаёк”, прасілі сонейка абагрэць зямлю.

Людзі кажуць, што вясну прыносяць птушкі. Для свята нашы выхаванцы ўпрыгожылі залу птушачкамі, якіх яны зрабілі з паперы, саломы, цеста на гуртку “Дэкаратыўна-прыкладное мастацтва” пад кіраўніцтвам выхавальніцы Жанны Найдзіч. Рознакаляровых самаробных птушак дзеці пасадзілі на дрэўца як мага вышэй з верай, што птушкі, якія вяртаюцца з выраю, хутчэй убачаць свой родны кут, выберуць чыюсьці хату – і там будзе шчасце.

Вельмі хацелася  наблізіць прыход красуні-вясны, паслухаць спевы птушачак,  дзеля гэтага дзеці  пасвісталі ў свістулькі.