Вытворчыя брыгады – «Цёпламу дому»

У пятніцу, 13 лістапада, 23 камплеты пасцельнай бялізны перадалі прадстаўнікам тэрытарыяльнага цэнтра сацыяльнага абслугоўвання “Цёплы дом” гімназісты, якія працавалі падчас вакацый у вытворчай брыгадзе.

Па словах галоўнага спецыяліста аддзела дзяржаўнай занятасці райвыканкама Галіны Бойка, у межах праграмы часовай працоўнай занятасці моладзі створаны вытворчыя брыгады ва ўсіх гарадскіх школах, у ліцэі і некаторых сельскіх школах. Усяго часовай занятасцю ахоплены ў нашым раёне 422 навучэнцы.

Дырэктар гімназіі Ірына Дурэйка выказала падзяку вучаніцам 8-10 класаў, якія падчас асенніх канікул працавалі ў майстэрнях гімназіі і вельмі якасна навучыліся шыць пад кіраўніцтвам настаўніцы працоўнага навучання Тамары Сцяпанаўны Гісіч. Усяго дзяўчаты пашылі 46 камплектаў пасцельнай бялізны. Частка якой застанецца ў гімназіі для навучэнцаў групы падоўжанага дня.

Дырэктару УТЦСАН Марыне Нікалайчык акрамя бялізны для пастаяльцаў дамоў сумеснага пражывання гімназісты перадалі яшчэ ручнікі, насоўкі, якія таксама спатрэбяцца пажылым людзям.

Ала СТРАШЫНСКАЯ.

Фота аўтара.