Беражы цяпло і святло – зямля нам будзе ўдзячна!

У дзяржаўнай установе адукацыі “Яслі-сад №15 г. Смаргоні” прайшоў шэраг мерапрыемстваў, прысвечаных Міжнароднаму дню энергазберажэння.

З выхаванцамі сярэдніх і старшых груп былі праведзены гутаркі “Чаму трэба берагчы святло, цяпло і ваду”, “Як беражліва ставіцца да электрычнасці”, “Урокі Берагошы”, “Простыя правілы эканомных і беражлівых”, “Прыгоды лямпачкі”. У ходзе гутарак дзеці даведаліся пра тое, як можна эканоміць энергарэсурсы дома і ў дзіцячым садзе і пра тое, якую ролю адыгрывае эканомія энергіі ў захаванні экалогіі Зямлі. Удзельнічаючы ў сюжэтна-ролевых і дыдактычных гульнях “Наш дом”, “Памочнікі чалавека”, “Бытавая тэхніка ў доме” выхаванцы яшчэ раз замацавалі правілы абыходжання з электрапрыборамі.

З выхаванцамі старэйшай групы №5 дарослыя правялі квэст-гульню “Яго Вялікасць электрычнасць і прынц Ток”, а выхаванцы старэйшай групы №4 даведаліся шмат цікавага на занятку “У гасцях у беражлівай кропелькі”.

Дзеці другіх малодшых груп не засталіся ў баку. Для дзяўчынак і хлопчыкаў быў паказаны міні-спектакль “Азбука Берагошы”.

Усе выхаванцы ясляў-сада сумесна з бацькамі прынялі актыўны ўдзел у выставе малюнкаў пад дэвізам: “Беражы цяпло і святло – зямля нам будзе ўдзячна!” У сваіх творах яны адлюстравалі, якім чынам можна і трэба эканоміць спажыванне розных энергарэсурсаў.

На працягу ўсіх мерапрыемстаў дзеці даведваліся, як можна самому зберагчы энергію і захаваць прыроду. Мы ўпэўнены, што ўсе атрыманыя дзецьмі веды будуць выкарыстоўвацца імі ў паўсядзённым жыцці.

Алена Траскоўская,

музычны кіраўнік  ДУА “Яслі-сад №15 г.Смаргоні”.