Фальклорны калектыў «Кужэліца» з 2013 года працуе на базе Сінькоўскага Дома культуры, але яго вытокі нашмат глыбейшыя. Сваю творчую дзейнасць ён пачынаў у 1949 годзе пры Шутавіцкім сельскім Доме культуры.
Аўтэнтычная “Кужэліца”
Культура
08.04.2024
За высокі мастацкі ўзровень і выканальніцкае майстэрства ў 1992 годзе яму было прысвоена званне “народны”. “Калектыў з’яўляецца носьбітам традыцый па адраджэнні святочнай каляндарнай абраднасці. У нашым рэпертуары - песні святаў народнага календара, сямейна-бытавога напрамку, беларускія народныя песні. Стаўку робім на аўтэнтычнасць, на мясцовыя адметнасці. Многія песні перанялі ад былых удзельнікаў калектыву, большасці з якіх ужо няма ўжывых. У нашым сшытку таксама сабраны тэсты песень ад мясцовых жыхароў – з вёсак Сівіца, Загор’е, Ласавічы, - адзначае Наталля Руткоўская, кіраўнік калектыву. – Але апошнім часам мы вырашылі разнастаіць рэпертуар, дадалі вясёлых, кірмашовых песень, прыпевак”.
У 2022 годзе ў сувязі са змяненнем складу калектыву народны фальклорны калектыў вёскі Шутавічы быў перайменаваны ў народны фальклорны калектыў “Кужэліца”.
Адкуль такая незвычайная назва? Як сцвярджае Наталля Руткоўская, слова “кужэліца” яны прыдумалі самі. За аснову ўзялі назву рэчкі Кужэц, якая працякала ў Загор’і. Цяпер яе назва захавалася і ў незвычайным выглядзе: фальклорны калектыў нават такім чынам захоўвае мясцовую гісторыю.
“Кужэліца” – пастаянны ўдзельнік раённых і абласных святаў, а таксама конкурсаў. У 2023 годзе быў адзначаны дыпломам лаўрэата II ступені V міжнароднага конкурсу мастацтваў “Ключы да таленту”, а на IV міжнародным фестывалі мастацтваў “Вёска fest” стаў лаўрэата I ступені.
Галіна АНТОНАВА
Фота аўтара.
Интересные и актуальные новости Сморгонского района в нашем Telegram-канале. Подписывайтесь по ссылке!
