У зале Залескага Дома культуры – яблыку не было дзе ўпасці. Каб паглядзець канцэртную праграму, якую культработнікі падрыхтавалі на традыцыйны раённы агляд-конкурс па ўсіх відах і жанрах аматарскай мастацкай творчасці “Распахнем акенца творчасці”, сабраліся не толькі жыхары Залесся, але і бліжэйшых населеных пунктаў.
У «акенцы творчасці» - артысты Залескага Дома культуры
Культура
06.03.2022
Сёлета на суд журы і гледачоў была прапанавана канцэртная праграма “Гэты мір прыдуманы намі”. Свае таленты прадставілі ўдзельнікі гуртка “Майстэрства вядучых”, (працуе на базе ДК са студзеня) і сольнага гуртка “Кварта” (заснаваны пяць гадоў таму, яго наведваюць падлеткі і дарослыя).
У абноўленым складзе выйшла на сцэну вакальная група “Заляснянка”, якой кіруе Лілія Мураўская.
Сучасную містэрыю па матывах міні-п’есы Яраслава Бурана “Салдат і Анёл” прапанавалі ўдзельнікі народнага тэатра “Батлейка”. У 1983 годзе ён быў тут створаны і працуе дагэтуль. На працягу апошніх 18 гадоў ім кіруе Таццяна Несцюрына, чалавек улюбёны ў сваю работу і гледачоў.
Тэатр мініяцюр “Марыянеткі” прадставіў “Бяссонніцу”. Як адзначыла кіраўнік тэатра Аксана Ліс, у трупе – 8 чалавек, сярод іх ёсць студэнты, хатняя гаспадыня, настаўніца, чыгуначнік… Яны з радасцю спяшаюцца на рэпетыцыі і выступаюць на сцэне. Тэатр мініяцюр працуе пры Доме культуры васемнаццаты год.
Заключным акордам святочнай праграмы стала вакальна-харэаграфічная кампазіцыя “Вясняначка” ў выкананні бібліятэкара Залескай бібліятэкі Ганны Расошка (вакал) і юных залескіх танцорак.
Залескі Дом культуры - цудоўны культурна-забаўляльны цэнтр, які збірае пад сваім дахам людзей, неабыякавых да сваёй малой радзімы і спадчыны продкаў. Яго гаспадар Сяргей Харытон разам са сваімі аднадумцамі (прафесіяналамі сваёй справы) праводзіць розныя мерапрыемствы для вяскоўцаў і гасцей аграгарадка, самым папулярным сярод якіх з’яўляецца Купалле.
Галіна АНТОНАВА.
Фота аўтара.
