Каб упэўнена сябе адчуваць на роднай зямлі, трэба мець моцныя карані. Карані – гэта родная мова, гісторыя, культура, памяць, адным словам, скарб, які пакінулі продкі.
Па драбніцах збірала журналістка газеты “Светлы шлях” Галіна Антонава тое, што пачынае адыходзіць у нябыт, што аслабляе каранёвую сістэму народа.
“Спачатку гэта былі матэрыялы для газеты пад рубрыкай “З крыніц народных, жыватворных, - кажа Галіна Францішкаўна, - але з цягам часу назапасіўся багаты гістарычны архіў, які выклікаў цікавасць сярод чытачоў. І мне захацелася сабраныя матэрыялы размясціць пад адну вокладку і выдаць кнігу “Самародкі”.
25 чэрвеня Смаргонская раённая бібліятэка ў літаратурна-музычнай гасцёўні “Сустрэчы” правяла прэзентацыю гэтай кнігі. Мерапрыемства працяглы час адкладвалі з-за пандэміі каранавірусу.
Перад прысутнымі зноў паўстала цэлая галерэя народных вобразаў – самабытных музыкаў, мастачкі, вясельнай паварыхі, абараначніцы, майстра музычных інструментаў, вышывальшчыцы, лозапляцельшчыкаў, краўчыхі, фатографа. Усе гэтыя людзі не мелі спецыяльнай адукацыі, але ў сваёй прафесіі былі сапраўднымі “профі”.
Большасць герояў кнігі няма ў жывых. Самабытныя музыкі Пётр Драгун з Гараняў і Генрых Бярнат з Кушлянаў памерлі не так даўно. Галіна Антонава паспела з імі сустрэцца і запісаць іх жыццёвыя гісторыі.
На прэзентацыі прысутнічалі вышывальшчыца Зоф’я Войтка і самабытная музыкантка Ірэна Шэміс – найбольш маладыя героі кнігі “Самародкі”. Зоф’я цудоўна вышывае ручнікі, а Ірэна – не толькі музыка-самавучка, але і кампазітар, мае свой канал на Ютубе і 2,6 тысячы падпісчыкаў.
Да выступленняў далучылася і выхавальніца беларускамоўнай групы садка №8 Эдзіта Бранцэвіч, якая добра ведае беларускія традыцыі і абрады, захапляецца народнымі танцамі і музыкай. Прысутным Эдзіта Браніславаўна расказала, як збірае народную спадчыну і як дзеліцца ёю з маленькімі выхаванцамі.
Заключным акордам імпрэзы стала выступленне смаргонскай паэткі Веры Вайцюль, якая прачытала свой верш “Прастора вобразаў”.
Дырэктар цэнтральнай раённай бібліятэкі Святлана Афанасьева падзякавала Галіну Антонаву за яе творчасць, уручыла кветкавую кампазіцыю. Аўтар кнігі перадала ў бібліятэкі горада дзве кнігі “Самародкі”. Адна з іх будзе захоўвацца ў цэнтральнай раённай бібліятэцы, другая – у бібліятэцы №3 (у Заходнім мікрараёне), дзе праходзіла імпрэза.
Арганізатары прэзентацыі падрыхтавалі для выступоўцаў васількі – сімвал сінявокай Беларусі. І ў зале запанаваў васільковы настрой…
Аляксандра ЦЫБОЎСКАЯ.
Фота Галіны АНТОНАВАЙ і Юліі ЛЯНКЕВІЧ.
