У Смаргоні ўрачыста адзначылі Дзень Дзяржаўнага сцяга, Дзяржаўнага герба і Дзяржаўнага гімна Рэспублікі Беларусь

“Ёсць даты, якія аб’ядноўваюць нацыю, выражаюць дух народа, сімвалізуюць яго славутае мінулае, сучаснае і будучае. Да іх ліку адносіцца Дзень Дзяржаўнага сцяга, Дзяржаўнага герба і Дзяржаўнага Гімна Рэспублікі Беларусь”.

Дзень дзяржаўных сімвалаў – гэта свята грамадзянскага міру і добрай згоды ўсіх людзей на аснове закона і справядлівасці, сімвал нацыянальнага яднання і агульнай адказнасці за цяперашні час і будучае нашай Радзімы”, - менавіта гэтымі словамі вядучыя распачалі ўрачыстае мерапрыемства, якое адбылося 14 мая на галоўнай плошчы Смаргоні.

Ганаровае права ўзняць Дзяржаўны сцяг Рэспублікі Беларусь было прадастаўлена кіраўнікам арганізацый Смаргоншчыны, якія нядаўна былі занесены на абласную Дошку гонару, - Вользе Лук’яненцы, дырэктару КСУП “АграСолы”, і Міхаілу Найдзічу, дырэктару РУП “ЖКГ”, а таксама Анастасіі Ванеевай, вучаніцы СШ №7, пераможцы рэспубліканскай алімпіяды па беларускай мове і літаратуры.

З прывітальным словам да прысутных звярнуўся старшыня райвыканкама Генадзь Харужык. “Наш сучасны герб, сцяг і гімн аб’ядноўваюць лёсы розных пакаленняў беларусаў, увасабляюць шматвекавы вопыт дзяржаўнага будаўніцтва, з’яўляюцца арыенцірам на будучае роднай Беларусі  - мірнай, моцнай, суверэннай. Сёння мы асабліва падкрэсліваем значнасць гэтых сімвалаў для нашай сучаснай дзяржавы”, - адзначыў Генадзь Васільевіч.

Пасля гэтага 14 лепшых вучняў устаноў адукацыі Смаргоні прынялі ў піянеры. Гальштукі дзецям павязалі прадстаўнікі раённай улады і лідары грамадскіх аб’яднанняў.

Са словамі віншавання да піянераў звярнулася старшыня раённага Савета ветэранаў Ірына Галдыцкая: “Ваша жыццё ўлілося  ў вялікую плынь піянерскага руху. Піянер – значыць, першы. Піянер – значыць, - лепшы. І вы гэта дакажаце сваёй вучобай, сваімі ўчынкамі, сваёй дружбай. Будзьце моцнымі, смелымі, адказнымі, працавітымі. Любіце Радзіму і ганарыцеся ёю!”.

Членскія білеты Беларускага рэспубліканскага саюза моладзі першы сакратар РК ГА “БРСМ” Кацярына Сарока і дырэктар СШ №5 Раіса Захарыч уручылі 11 творчым і актыўным маладым людзям Смаргоні.

Апагеем свята можна назваць момант, калі ўдзельнікі ўрачыстасці разам з узорным дзіцячым хорам “Глорыя” з СШ №5, хорам дзіцячай школы мастацтваў імя Агінскага, народным хорам ветэранаў і харавой групай народнага ансамбля песні і танца імя Агінскага РЦК выканалі Дзяржаўны гімн Рэспублікі Беларусь.

Заключным акордам свята стала ўскладанне “гірлянды Памяці” да помніка загінуўшым воінам і партызанам.

Галіна АНТОНАВА.

Фота аўтара.