Штогод 21 лютага ва ўсім свеце адзначаецца Міжнародны дзень роднай мовы.
Квітней, наша родная мова!
Общество
21.02.2025
З мэтай абуджэння цікавасці да беларускай мовы, выхавання пачуцця гонару за родную мову і паважлівых адносін да яе ў старшай групе №4 Смаргонскага дашкольнага цэнтра развіцця дзіцяці прайшло музычна-пазнавальнае мерапрыемства.
Да дзяцей завітаў у госці Буслік, з сабой ён прынёс чароўную кнігу з беларускімі народнымі казкамі, забаўлянкамі, займальнымі гульнямі і гісторыямі. З самага пачатку было прыемна назіраць як выхаванцы віталі адзін аднаго і жадалі добрага настрою на беларускай мове. З захапленнем яны спаборнічалі ў веданні роднай мовы, выконваючы цікавыя заданні: адгадвалі загадкі, перакладалі словы з рускай мовы на беларускую, на хуткасць і выразнасць прагаворвалі скорагаворкі, актыўна ўдзельнічалі ў беларускіх народных гульнях.
Хлопчыкі бадзёра гралі на лыжках пад беларускую народную мелодыю, а дзяўчаты прадэманстравалі свае харэаграфічныя здольнасці ў танцы з ручнікамі.
Мерапрыемства прайшло з карысцю – дапамагло замацаваць веды дзяцей аб мове, пашырыла слоўнікавы запас і паказала разнастайнасць і багацце роднай мовы.
Ганна Барташэвіч, музычны кіраўнік,
Валянціна Урбанайць, выхавальнік дашкольнай адукацыі
ДУА «Смаргонскі дашкольны цэнтр развіцця дзіцяці».
