У кожнай школы ёсць свае вартасці. Але ёсць і тое, што іх аб’ядноўвае: у першую суботу лютага праходзіць традыцыйны вечар сустрэчы з выпускнікамі. Унікальнасць школы ў тым, што плён яе працы бачны не адразу, а праз гады і дзесяцігоддзі. Вынікі працы школы – яе выпускнікі, якія дасягнулі прафесійных вышынь. Гэта людзі, пра якіх мы з гордасцю кажам: «Яны вучыліся ў нашай школе».
Гонар школы – знакамітыя выпускнікі
Общество
20.01.2025
Сярод знакамітых выпускнікоў Вішнеўскай сярэдняй школы – дырэктар камунальнага сельскагаспадарчага ўнітарнага прадпрыемства «АграСолы» Вольга Лук’яненка. На днях у рамках прафарыентацыйнай работы адбылася сустрэча старшакласнікаў нашай школы з Вольгай Іванаўнай.
Супрацьпаставіўшы цяжкасцям велізарную працавітасць, вопыт, самаахвярнасць і веру ў лепшы зыход, Вольга Лук’яненка змагла дабіцца значных вынікаў у вытворчасці. Сёння КСУП «АграСолы» знаходзіцца ў ліку лепшых прадпрыемстваў Гродзеншчыны. Тэхналогіі ўдасканальваюцца вельмі хутка, і гаспадарка імкнецца ісці ў нагу з часам. Прыкладам таму з’яўляюцца нядаўна ўзведзеныя сельскагаспадарчыя аб’екты. Вольга Лук’яненка прапанавала навучэнцам наведаць малочна-таварны комплекс «Вікторыя», міні-завод па вытворчасці камбікорму, цэх па перапрацоўцы рапсу.
Вольга Іванаўна расказала навучэнцам пра свой шлях у сельскую гаспадарку, пра штодзённыя клопаты, поспехі і няўдачы. Напрыклад, па аб’ёме малака, якое рэалізуецца, гаспадарка займае другое месца ў вобласці. Сёння гэта лічба дасягае 100 тон у дзень. Дырэктар КСУП адзначыла, што згуртаваная каманда – галоўны фактар поспеху прадпрыемства. Дырэктар клапоціцца пра тое, каб людзі з радасцю ішлі на работу і мелі ўсе ўмовы для эфектыўнай працы. Работнікам прадстаўляецца добраўпарадкаванае жыллё, годны заробак з поўным сацыяльным пакетам. Заключаюцца мэтавыя дагаворы на падрыхтоўку маладых спецыялістаў.
Вольга Іванаўна мае званні «Заслужанага работніка сельскай гаспадаркі Рэспублікі Беларусь» і «Ганаровага грамадзяніна Смаргонскага раёна», з’яўляецца лаўрэатам прэміі «Чалавек года Гродзеншчыны ў вытворчай сферы за 2018 год», узнагароджана медалём «За працоўныя заслугі». Жыць так, каб у справах не было застою, быць адкрытай да людзей, кожны дзень рабіць крыху больш, чым было ў планах, – такімі жыццёвымі ўстаноўкамі кіруецца Вольга Іванаўна.
Экскурсія завяршылася ў кафэ «РознаСолы», дзе Вольга Лук’яненка адказала на шматлікія пытанні навучэнцаў. Сустрэча са знакамітай выпускніцай Вішнеўскай СШ пакінула незабыўныя ўражанні.
Нэлі ТУМАШ, настаўнік гісторыі ДУА «Вішнеўская сярэдняя школа»
Статьи по теме:
19.01.25
18.01.25
