Манументальнае дойлідства – адна з самых важных частак матэрыяльнай і духоўнай культуры кожнага народа. Яно складае спрадвечнае асяроддзе чалавечага быцця, надае яму рукатворную прыгажосць і цеплыню. Архітэктура – гэта матэрыяльнае ўвасабленне гісторыі грамадства. “Сведкі мінуўшчыны” – так называецца выстава, прысвечаная святыням Смаргоншчыны. Яе ўрачыстае адкрыццё адбылося 22 сакавіка ў гісторыка-краязнаўчым музеі.
«Сведкі мінуўшчыны». У Смаргоні адкрылася выстава, прысвечаная святыням раёна
Общество
22.03.2024
Перад прысутнымі выступілі госці: пробашч касцёла Святога Міхала Арханёла айцец Артур Ляшнеўскі, благачынны Смаргонскай акругі, настаяцель сабора Праабражэння Гасподняга, протаіерэй Анатоль Рэзановіч і старшы навуковы супрацоўнік музея-сядзібы М. К. Агінскага Васіль Грыбанаў, які глыбока вывучае гісторыю праваслаўных храмаў Смаргоншчыны.
Старажытным храмам у Смаргоні з'яўляецца касцёл святога Міхала Арханёла - сведка шматлікіх падзей, якія тут адбываліся. Сёння гэта святыня – галоўная славутасць нашага горада, якая прыцягвае не толькі шматлікіх вернікаў, але і людзей, улюбёных у гісторыю, турыстаў з-за межаў Смаргоншчыны. Дзякуючы ксяндзу Артуру наведвальнікі выставы маюць магчымасць пазнаёміцца з літургічным начыннем касцёла святога Міхала Арханёла, з малітоўнікам 1890 года, які належаў прабабулі святара.
Вось ужо 15 гадоў запрашае ў святыню і апавяшчае аб богаслужэнні перазвон Спаса-Праабражэнскага сабора. Айцец Анатоль, настаяцель сабора, раней перадаў у музей царкоўнае адзенне і сучасны складзень, а ўпершыню на выставе прадстаўлена галаграма абраза Божай Маці Сукневіцкай.
Выхаванне чалавека, які адчувае гонар за краіну, пачынаецца з вывучэння сваёй малой радзімы, яе святых месцаў. Менавіта гэтай справай займаецца Васіль Грыбанаў, грунтоўныя нарысы якога друкуюцца ў газеце “Светлы шлях”.
Працаваць выстава будзе да 21 красавіка.
Галіна АНТОНАВА
Фота аўтара.
Интересные и актуальные новости Сморгонского района в нашем Telegram-канале. Подписывайтесь по ссылке!
