“Волга” ГАЗ-21 у 60-я гады мінулага стагоддзя стала сапраўднай “зоркай” савецкага кінематографа. “Беражыся аўтамабіля”, “Брыльянтавая рука” – самыя вядомыя фільмы з удзелам гэтага аўтамабіля. Яна была, напэўна, самай жаданай машынай у СССР. Цяпер сустрэць такую на дарогах цяжка, тым больш дзіўна было ўбачыць такую “Волгу” ў адным з прыватных двароў у Смаргоні.
Па смаргонскіх дарогах едзе блакітнае дзіва
Общество
26.08.2023
“Не прадаецца, у гонках не ўдзельнічае, вяселлі не возіць” – адразу расставіў усе кропкі над “і” гаспадар. Ён упэўнены, што такой машыне даўно не месца на сучасных дарогах, і выязджае на ёй рэдка – толькі каб не застойвалася ў гаражы. Па машыне бачна, што яе берагуць – ні драпінкі, ні плямкі. Як выпусцілі ў 1960 годзе, так нічога не варылі, не перараблялі. Тры гады назад смаргонскаму пенсіянеру падараваў гэты аўтамабіль сын. За гэты час рамонту запатрабавалі толькі тармазы – раз’ела шлангі з-за неадпаведнасці тармазной вадкасці (тую, якую залівалі ў “Волгу” першапачаткова, даўно не выпускаюць).
“Калісьці ў 1979 годзе я купіў сваю першую машыну – “Запарожац”. Каб мне тады такую “Волгу”, я б танцаваў ад шчасця”, - смяецца гаспадар. Але і сёння па тым, як беражліва адчыняе ён дзверцы, у якім парадку трымае салон, бачна, што блакітны “ГАЗ” прыносіць яму радасць, задавальненне і гонар.
Віялета ВОЙТКА.
Фота аўтара.