У госці да Агінскага завіталі вучні Сольскай СШ

 Залессе – маляўнічы куток зямлі беларускай, які вабіць усіх, каго цікавіць гісторыя і культура нашага краю. Каб пазнаёміцца з жыццём і дзейнасцю таленавітага кампазітара Міхала Клеафаса Агінскага, вучні пачатковых класаў ДУА “Сольская сярэдняя школа” наведалі музей-сядзібу М. К. Агінскага.

Знаёмячыся з экспазіцыямі музея, школьнікі з цікавасцю слухалі аповеды экскурсавода пра сям’ю Агінскага, яго дзяцінства і любоў да музыкі, пра настаўніка і сяброў. Падчас экскурсіі дзеці ўважліва разглядалі галерэю партрэтаў членаў сям’і, родных і блізкіх людзей роду Агінскіх. Хлопчыкі і дзяўчынкі даведаліся, што сядзіба ў Залессі была месцам, дзе збіраліся знакамітыя людзі таго часу. Іх вабіла творчая атмасфера сядзібы з яе тэатральнай і музычнымі заламі, аранжарэямі, паркам, канюшнямі і нават звярынцамі.

 Зала “Музыка Агінскага” зацікавіла вучняў музычнымі інструментамі 19 ст. Чароўныя гукі сумнай і адначасова мужнай мелодыі паланэза “Развітанне з Радзімай” дазволілі ім акунуцца ў тое музычнае асяроддзе, якое панавала ў гэтым палацы пры жыцці кампазітара.

Уразілі вучняў інтэр’ер і экспанаты “Вялікай гасцінай”: незвычайны гадзіннік, разное люстэрка, адмысловы посуд. Асабліва здзівіла тое, што ўсе гэтыя рэчы адносяцца да 19 стагоддзя.

 Зацікавіў дзяцей вялікі більярдны стол. Госці Агінскага любілі праводіць вольны час за гульнёй у більярд.

 У тэатральна-музычнай зале палаца школьнікі размясціліся на крэслах, каб на хвіліну ўявіць сябе гледачамі тэатральнай пастаноўкі з музыкай, танцамі, дзеяннямі.

 Захапленне і эстэтычную асалоду атрымалі дзеці ад прыгажосці зімовай аранжарэі. Колькі разнастайных экзатычных раслін яны тут убачылі!

Напрыканцы экскурсіі вучні падзяліліся сваімі ўражаннямі, выказалі пажаданні і далей падарожнічаць па славутых мясцінах Беларусі.

Ірына Ядзевіч,

настаўнік пачатковых класаў ДУА

“Сольская сярэдняя школа”.