Смачныя атрыбуты святочнага стала

А напярэдадні такой важнай справы – вырабу святочнага печыва - пробашч парафіі Святога Міхаіла Арханёла Артур Ляшнеўскі наведаў вытворчы цэх “Смаргонь”. “Сёння я тут, каб блаславіць працаўнікоў, месца іх працы і пачатак іх работы. Зазначу, што сёння не бласлаўляюцца вырабы, якія пазней будуць прадавацца ў крамах нашага горада, бо святымі рэчамі гандляваць нельга, - зрабіў важны акцэнт ксёндз Артур. – Вытворцы зробяць святочныя булкі і пірагі, якія пазней людзі купяць і прынясуць у касцёл у Вялікую суботу для бласлаўлення, а пасля будуць імі дзяліцца адзін з адным падчас велікоднага сняданку ў нядзелю.

Сёння таксама памолімся  за ўсіх, хто працуе на гэтай вытворчасці, праз заступніцтва Святой мучаніцы Агаты, якая ў каталіцкім касцёле з’яўляецца апякункай усіх пекараў”.

Напрыканцы малітвы святар асвяціў абраз Святой Агаты і падарыў яго работнікам цэха.

“Заўсёды з душой” – менавіта так гучыць дэвіз работнікаў ААТ “Гроднахлебпрам” , - зазначае вядучы інжынер-тэхнолаг вытворчага цэха “Смаргонь” Вольга Страшынская. – І мы сапраўды з душой вырабляем сваю прадукцыю, а потым з радасцю прапаноўваем  яе пакупнікам.  Да Вялікадня мы выпякаем кексы “Каложскі” новы, “Світанак” з дробсамі, “Васкрэсны” з разынкамі, пірог “Маладзечанскі” з макам, пячэнне “Сувенірнае”, а таксама шырокі асартымент крэмавых і хлебабулачных вырабаў. Запрашаем у магазіны горада і раёна за нашай смачнай свежай прадукцыяй”.

Галіна АНТОНАВА.

Фота аўтара.