21 лютага адзначаецца Міжнародны дзень роднай мовы. Сёння ў свеце шмат цудоўных моў. Адны з іх вабяць сваёй прыгажосцю і непаўторнасцю, другія – мілагучнасцю. Але ў кожнага чалавека ёсць толькі адна родная мова.
У Сінькоўскай СШ прайшоў Дзень роднай мовы
Общество
22.02.2022
Вучні знаёмяцца з рознымі слоўнікамі і творамі беларускай мовы.
У пачатковых класах Сінькоўскага ясляў-сада - сярэдняй школы прайшло мерапрыемства “У роднай мовы - роднае карэнне”, прысвечанае Міжнароднаму дню роднай мовы.
Падзея праходзіла пад дэвізам “Размаўляй са мной па-беларуску”. Навучэнцы пазнаёміліся з гісторыяй свята, прагледзелі відэаролік, дзе вядомыя беларусы выказваюцца пра родную мову, а таксама пазнаёміліся з выказваннямі славутых пісьменнікаў. Найбольш даспадобы дзецям прыйшлося выказванне Алеся Разанава: “Кожны народ мае хаця б адзін геніяльны твор, i гэты твор – мова”.
Падчас гульні вучні патрымалі ў руках розныя слоўнікі беларускай мовы, пазнаёміліся са старажытнай і сучаснай лексікай роднай мовы. У форме гульні былі праведзены конкурсы “Перакладчык”, “Беларуская прыказка”, “Рэбусы”, “Вясёлая пантаміма”.
Напрыканцы мерапрыемства школьнікі адказалі на галоўнае пытанне: “Чаму нам трэба берагчы і паважаць родную мову?”. Кожны вучань выказаўся, з чым асацыіруецца родная мова. Варыянты былі розныя: з кветкамі, са школай, з маці, з вёскай. Але самае галоўнае тое, што ўсе дзеці ўсвядомілі, што наша мова – беларуская – самая родная і прыгожая.
Дзіяна БОЛДЫШ,
настаўніца пачатковых класаў Сінькаўскай СШ.