Віртуальная вандроўка па сцяжынках роднага краю

Для навучэнцаў 5, 6 класаў установы адукацыі «Сінькоўскі яслі-сад – сярэдняя школа» гэта была займальная віртуальная вандроўка па сцяжынках роднага краю. Падарожжа пачалося з інтэлектуальнай размінкі «Мая Смаргоншчына». Пытанні размяшчаліся на стракатых кветачках, і сарваць іх можна было толькі тады, калі даваўся правільны адказ. Такім чынам атрымаўся  букет  у гонар нашых славутых землякоў, пра якіх узгадалі ў час вандроўкі.

Потым вучні па фотаздымках вызначалі населеныя пункты сваёй маленькай радзімы. Кожны, хто пазнаў сваю вёску, расказваў пра яе адметнасць і непаўторнасць. Заданне выклікала вялікую цікавасць  і аказалася не такім ужо і лёгкім, як здавалася адразу. У час «Хвілінкі адпачынку» дзеці ўзнаўлялі пасланні, пакінутыя для нас нашымі далёкімі продкамі. Імі аказаліся прыказкі, у якіх адлюстравана любоў да свайго краю, свайго народа.

Вандроўка закончылася словамі  прызнання ў шчырай і адданай любові да сваёй Бацькаўшчыны, якія кожны ўдзельнік выказаў і запісаў на сімвалічным «Сэрцы любові».

Вера ЛОБАЧ,

бібліятэкар дзяржаўнай установы адукацыі

 «Сінькоўскі яслі-сад – сярэдняя школа».