На Смаргоншчыне распачынаецца Міжнародны гуманітарны праект YES!
Культура
11.12.2020
Гэта інфармацыя была агучана падчас сустрэчы ў Смаргоні з прадстаўнікамі дабрачыннага каталіцкага аб’яднання “Карытас Беларусь”. На мерапрыемстве прысутнічалі прадстаўнікі мясцовай улады, грамадскіх аб’яднанняў, кіраўніцтва і супрацоўнікі ЦБУ ААТ “Белаграпрамбанк”.
Знайсці сябе, распазнаць свае схільнасці і атрымаць штуршок да самарэалізацыі – так часта гэтага не хапае маладым людзям, каб на поўную моц развіць свой талент і стаць самастойным. Менавіта на такую моладзь разлічаны Міжнародны праект YES! “Скарачэнне беднасці шляхам працаўладкавання сацыяльна-неабароненай моладзі ў рэгіёнах Беларусі”. Яго рэалізуе па ўсёй рэспубліцы дабрачыннае каталіцкае аб’яднанне “Карытас Беларусь” пры падтрымцы Renovabis (Германія) і Caritas Linz (Аўстрыя).
“Галоўная мэта праекта – скіраваць намаганні маладых людзей Беларусі ва ўзросце ад 17 да 35 гадоў на працаўладкаванне, на пераўтварэнне асабістых ідэй у жыццё, навучыць зарабляць грошы і, тым самым, павысіць узровень якасці жыццядзейнасці ў сельскай мясцовасці, - зазначае Наталля Вішнеўская, мэнэджэр праекта YES! па Гродзенскай вобласці. - Праект будзе рэалізоўвацца да канца 2022 года на тэрыторыі Ашмянскага, Смаргонскага і Шчучынскага раёнаў пры непасрэдным удзеле Карытас Гродна і падрымцы прадстаўнікоў мясцовай улады. Партнёрскія ўзаемаадносіны ў межах праекта будуць пашырацца ва ўмовах развіцця стратэгіі ўстойлівага сацыяльна-эканамічнага развіцця раёна, і пашырэння ініцыятывы па падрымцы вытворчай дзейнасці, стварэння рабочых месцаў і падтрымцы прадпрымальніцтва”.
Дарэчы, у Шчучыне ўжо адкрыўся Рэгіянальны цэнтр развіцця сацыяльна-арыентаванага мясцовага прадпрымальніцтва, які стане кансультацыйным цэнтрам для моладзі па падтрымцы ў галіне камерцыйнай дзейнасці. Яго філіялы будуць працаваць у Смаргоні і Ашмянах. Спецыялісты шырокага профілю правядуць кансультацыі, дадуць парады, дапамогуць з афармленнем дакументацыі.
Плануецца, што ў праекце прымуць удзел 70 маладых людзей (у тым ліку з інваліднасцю) са Смаргонскага раёна, якія будуць бясплатна навучацца па адукацыйных праграмах. Па выніках курсаў і семінараў на другі этап пройдуць найбольш мэтанакіраваныя і актыўныя маладыя людзі, якія будуць працаваць над асабістымі бізнес-ідэямі і змогуць рэалізаваць новыя праекты на тэрыторыі Смаргоншчыны.
Ужо зараз распачынаецца арганізацыя груп моладзі для навучання, якое пачнецца з 2021 года.
Тыя, каму ад 17 да 35 гадоў, і хто мае бізнес-ідэі, але пакуль не ведае, як іх рэалізаваць, ужо могуць звяртацца за дадатковай інфармацыяй па тэлефоне: +375(44)463-72-77 (Наталля Антонаўна Вішнеўская).
#YES#YourJobBelarus#CaritasBelarus Renovabis #CaritasLinz#CaritasGrodno#
Галіна АНТОНАВА.
Фота аўтара.
