На харчаванне кожнага дзіцяці дзяржава выдаткоўвае ў сярэднім каля пяці рублёў у дзень. Частку гэтых расходаў у канцы месяца кампенсуюць бацькі. Сума, пагадзіцеся, невялікая. Накарміць дзяцей смачна і карысна на такія грошы – сапраўднае майстэрства. Многае тут залежыць ад прафесіяналізму работнікаў кухні, а яшчэ… чэснасці. На жаль, у Смаргоні былі выпадкі крадзяжу са школьных сталовых. Аб тым, што за гэта пагражае службовым асобам, расказаў намеснік начальніка РАУС Віктар Каравай.
22.10.2023
“Па-першае, каб зафіксаваць выпадак крадзяжу, работнік сталовай ці іншы супрацоўнік установы павінен вынесці нешта такое, што можна ацаніць: пачак цукру, катлету, кавалак мяса, - расказвае Віктар Алегавіч. – Калі нанесены ўрон не перавышае 10 бв, правапарушэнне будзе кваліфікавана як дробны крадзеж з пакараннем у выглядзе адміністратыўнай адказнасці. Калі ж урон большы за 10 бв, прадугледжана крымінальная адказнасць”.
У красавіку мінулага года супрацоўнікі адной са школ горада стварылі ў падсобным памяшканні невялікі “магазін”, куды складвалі лішнія, па іх меркаванні, прадукты. Час ад часу нешта яны забіралі дахаты, але асноўная частка “тавару” чакала масавага вывазу. Супрацоўнікі міліцыі знайшлі там мяса, сыр, крупы і іншыя прадукты на вялікую суму. Віноўныя атрымалі па некалькі гадоў пазбаўлення волі з адтэрміноўкай пакарання.
А сёлета пажывіцца за кошт адпачываючых дзяцей вырашыла кладаўшчыца з лагера “Арляня”. На выездзе з тэрыторыі ахоўнік затрымаў машыну, груз у якой паказаўся яму падазроным. Выклікалі міліцыю, знайшлі ў аўтамабілі тварожныя сыркі, масла, рыбу і г. д. Пры вобыску ў доме віноўніцы знайшлі таксама прадукты, скрадзеныя з дзіцячага садка, дзе тая працавала. Памер урону аказаўся не такім вялікім, як у мінулым выпадку, “пацягнуў” толькі на адміністратыўную адказнасць.
“Мы, супрацоўнікі міліцыі, не робім рэгулярных праверак сталовых у школах, садках, бальніцах, - патлумачыў Віктар Каравай. – Праўда, патрульна-паставая служба можа звярнуць увагу, калі напрыканцы рабочага дня адтуль будуць выходзіць людзі з вялікімі сумкамі і пакетамі. І, як паказвае практыка, заўсёды знаходзіцца той чалавек, які дапаможа праўдзе выплыць на паверхню, тады віноўныя абавязкова будуць пакараны”.
Віялета ВОЙТКА.
Поделиться:
Статьи по теме:
Оставить комментарий
Войти через соцсети