Все новости

На імяніны да Міхала. У музеі-сядзібе ўрачыста адзначылі 257 гадавіну са дня нараджэння Міхала Клеафаса Агінскага

У Залессі ўрачыста адсвяткавалі 257 гадавіну са дня нараджэння Міхала Клеафаса Агінскага. Імпрэза пачалася з экскурсіі па парку.

Пасля гэтага ўдзельнікі свята накіраваліся ў тэатральна-музычную залу, дзе гасцей вітала Юзэфа, “родная сястра” Міхала Клеафаса Агінскага. Яна расказала пра дзіцячыя і юнацкія гады Міхала Клеафаса, пра настаўніка Жана Ралея і яго вялікую ролю ў выхаванні будучага палітыка і кампазітара.

Прысутныя віталі Ларысу Беледа-Альшанскую, якая жыве ў Маскве. Зусім нядаўна стала вядома, што бабуля Ларысы – дачка Амеліі, унучка Эммы, а значыць, праўнучка самога Міхала Клеафаса Агінскага! Гэта навіна стала нечаканай не толькі для супрацоўнікаў музея, але і для самой Ларысы Расціславаўны.

На залескай сцэне выступілі артысты з Маладзечна – народны струнны ансамбль “Амелія” (Маладзечанскі дзяржаўны музкаледж імя М. К. Агінскага), салісты народнага маладзёжнага музычнага тэатра. У іх выкананніі прагучалі эпізоды з оперы Алега Залётнева “Міхал Клеафас Агінскі. Невядомы партрэт”.

Першая ў свеце опера пра падзеі з жыцця вядомага палітычнага дзеяча і кампазітара была напісана па замове Рыгора Сарокі, кіраўніка сімфанічнага аркестра каледжа імя М. К. Агінскага. Рыгор Сямёнавіч таксама прысутнічаў на свяце, на гэты раз – у якасці гледача. Пасля выступлення артыстаў падарыў музею-сядзібе, а таксама Ларысе Беледа-Альшанскай выданні, у стварэнні якіх прымаў непасрэдны ўдзел, - кнігу “Матэрыяльная спадчына роду Агінскіх у Беларусі” і кнігу партытур.

Завяршылі канцэртную праграму музыканты аркестра Вялікага тэатра Рэспублікі Беларусь – трыа “GLORIA” і салісты тэатра Андрэй Мацюшонак, Дар’я Гаражанка, Алена Золава, Наталля Мурзіна, Анастасія Дубоўская.

Галіна АНТОНАВА.

Фота аўтара.

25.09.2022

Возврат к списку