Да свайго 80-гадовага юбілею Ірына Гаева, былая настаўніца гімназіі, выдала кнігу вершаў “На хвалях лёсу”. На прэзентацыі кнігі, якая адбылася 7 красавіка ў гарадской раённай бібліятэцы №3, сабраліся яе сябры, былыя калегі і вучні, аматары паэзіі.
Прэзентацыю кнігі “На хвалях лёсу” Ірыны Гаевай правяла Смаргонская раённая бібліятэка
Общество
07.04.2022
“У мой юбілейны год, хачу пакінуць на добры ўспамін сваім нашчадкам і ўсім добрым людзям своеасаблівую спадчыну – кнігу вершаў, - напісала Ірына Ніканораўна ў прадмове да кнігі. - Мае перажыванні, шчырая любоў да сям’і і вёскі, роднай зямлі, матулінай мовы, павага і ўдзячнасць людзям, з якімі пашанцавала сустракацца, жыць і працаваць, мае пачуцці, думкі, мары адлюстраваліся, як у родным возеры, у маіх вершах. Яны нараджаліся ў душы ад маладых гадоў да “залатога” ўзросту…
Не прэтэндую на гучнае званне паэта, але буду рада, калі вершы змогуць выклікаць у чытачоў прыемныя эмоцыі”.
Атрымаўся сапраўды цудоўны летапіс жыцця прыгожай жанчыны, настаўніка-прафесіянала, жонкі, маці, бабулі. Сама паэтка ж называе яго паэтычным дзённікам.
Кнігу Ірына Ніканораўна выдала за свае грошы. “Невялікім накладам. Я яе не прадаю, а дару тым, каму яна можа быць цікавай – родным, сябрам і проста харошым людзям”, – адзначыла гераіня вечарыны. Кнігі яна перадала і ў гарадскія бібліятэкі.
У прэзентацыі выдання прыняла ўдзел вакальная група “Крынічанька”, якая працуе на базе УТЦСОН “Цёплы дом”. Яна была створана дзесяць гадоў таму па ініцыятыве менавіта Ірыны Гаевай. Калектыў выканаў некалькі песень, сярод іх – аўтарскія кампазіцыі. Музыку да іх напісаў Васіль Карпец, кіраўнік вакальнай групы “Крынічанька”, на словы Ірына Гаевай.
Падрабязны рэпартаж з прэзентацыі чытайце ў папяровай версіі газеты.
Галіна АНТОНАВА.
Фота аўтара.