Напярэдадні Дня роднай мовы ў дзіцячым цэнтры развіцця дзіцяці з самага ранку разліваўся чароўны пах, які зыходзіў ад прыгатаваных беларускіх нацыянальных страў.
Мой край бульбяна-жытны
Общество
21.02.2021
“Смачны” дзень быў прымеркаваны да Дня роднай мовы, які адзначаецца 21 лютага. Сваіх выхаванцаў мы знаёмілі са стравамі беларускай нацыянальнай кухні, паэтычнымі творамі, прысвечанымі кулінарнаму майстэрству беларусаў, захаванню нацыянальных і сямейных традыцый.
Варта адзначыць, што ўсе стравы былі не толькі вельмі смачныя, але і арыгінальна аформлены. Стол упрыгожвалі бабка, наліснікі, верашчака, гульбішнік, бігос з квашанай капусты, жур, клёцкі, халаднік, каўбаска-вантробка, нават каравай і многае-многае іншае. Юныя кухары цэнтра расказалі, як яны з бацькамі гатавалі ўсе прысмакі. І ў гэты ж дзень адбылася прэзентацыя самаробнай кнігі “Нацыянальныя стравы ў маёй сям’і”.
Усе жадаючыя мелі магчымасць прадэгуставаць прапанаваныя прысмакі. Хочацца выказаць шчырыя словы падзякі бацькам за тое, што падтрымліваюць нас і з задавальненнем удзельнічаюць у нашых сумесных мерапрыемствах, якія стымулююць дзетак да авалодвання беларускім словам, вывучэння беларускай нацыянальнай культуры.