Азонавы слой для грамадства
У цэнтры карэкцыйна-развіваючага навучання і рэабілітацыі прайшоў незвычайны ранішнік. Выхаванцаў цэнтра – дзяцей з інваліднасцю – цешыў клоўн, дзеці танцавалі і ўдзельнічалі ў розных гульнях.
Прысутных забаўляў вясёлы клоўн
- Сёння мы завяршаем тыдзень дабра і міласэрнасці, які быў прысвечаны Дню інвалідаў, і распачынаем дабрачынную акцыю “Нашы дзеці”, - удакладніла Іна Цяляк, дырэктар ЦКРНіР. – Мы вельмі ўдзячныя ўсім, хто прыйшоў да нас у госці, хто падтрымаў матэрыяльна.
Іна Сяргееўна ўручыла падзячныя лісты за супрацоўніцтва і дапамогу начальніку РАУС Аляксандру Клімянкову, загадчыцы жаночай кансультацыі Кацярыне Шэлег, на- месніку дырэктара па ідэалагічнай рабоце філіяла “Жодзішкі” КХП Алене Мізуле, намесніку старшыні ГАА “Смаргонская ініцыятыва” Надзеі Карасёвай.
У «танцы дабрыні» закрыжыліся разам з дзецьмі Надзея КАРАСЁВА і Аляксандр КЛІМЯНКОЎ
Надзея Аляксандраўна, дарэчы, стаяла ля вытокаў стварэння гэтай установы. Упершыню ў рэспубліцы ў Смаргоні у 1996 годзе адкрыўся першы дыягнастычна-рэабілітацыйны цэнтр, які пазней ператварыўся ў ЦКРНіР.
- Вельмі рада, што прадаўжаецца справа, якую мы некалі распачыналі, - не хавала эмоцый Надзея Аляксандраўна. - А цяпер мы з вялікай ахвотай арганізоўваем акцыю “Падары дзіцяці радасць”. Колькасць тых, хто далучаецца да нашай акцыі, з кожным годам расце. Сёлета мы таксама падрыхтуем падарункі дзецям ЦКРНіР, улічваючы іх пажаданні.
Іна Цяляк узгадала і іншых партнёраў, якія не застаюцца ў баку ад патрэб іх установы, – лясгас, малаказавод, раённае аддзяленне Беларускага дзіцячага фонда, ТАА “Нанатэхнавак”.
“Мы адкрыты для супрацоўніцтва і дружбы, - зазначыла напрыканцы размовы Іна Сяргееўна. – Да нас часта прыходзяць валанцёры – выхаванцы цэнтра творчасці, вучні СШ №1 і 5, іншыя людзі таксама праяўляюць цікаўнасць. Мы гэтаму вельмі рады.
Галіна АНТОНАВА.
Фота аўтара.
