У літаратурна-музычнай гасцёўні “Сустрэчы” раённай бібліятэкі адбылася сустрэча-прэзентацыя “Самабытнасць у мастацтве”.
Адбылася прэзентацыя кнігі “Космас Анатоля Антонава”
Культура
10.02.2024
Журналістка раённай газеты “Светлы шлях” Галіна Антонава напісала кнігу “Космас Анатоля Антонава”.
Галіна Францішкаўна расказала аб тым, як стваралася кніга, пазнаёміла гасцей мерапрыемства з творчасцю самабытнага мастака Анатоля Антонава - бацькі мужа журналісткі. Выданне, якое першапачаткова задумвалася як фамільная памяць аб члене сям'і, стала падзеяй для нашага горада і Петрыкава, адкуль родам герой кнігі.
Аляксандр Антонаў падзяліўся ўспамінамі пра бацьку. Творчыя гены перадаліся ў спадчыну, ён таксама малюе карціны. Дарэчы, ўбачыць іх можна было падчас мерапрыемства. У бібліятэцы была арганізавана выстава работ Анатоля і Аляксандра Антонавых.
На прэзентацыі выступілі вакальны гурт "Місія" і ансамбль скрыпачоў "Чароўная скрыпка". Ансамбль дзіцячай школы мастацтваў выканаў мелодыю “Жураўлі на Палессе ляцяць”. Гэта адбылося не выпадкова. Палессе – малая радзіма героя кнігі. Амаль кожная работа самабытнага мастака – ода роднаму Палессю і асабліва яго жамчужыне - рацэ Прыпяць. Зліццё слоў і музыкі стварыла атмасферу, у якой кожны госць адчуў глыбіню і прыгажосць мастацтва.
Святлана Афанасьева, дырэктар Смаргонскай раённай бібліятэкі:
– Сённяшняя прэзентацыя – знакавая падзея для нашай абноўленай чытальнай залы бібліятэкі. Захапляюся Галінай Францішкаўнай. Яна шматдзетная маці, працуе і знаходзіць час тварыць.
Соф'я Лазар:
– Нашаму раёну пашанцавала, што тут працуе такая таленавітая журналістка. Галіна заўсёды ў творчым пошуку. Я знаёмая з многімі яе кнігамі пра людзей, якія жывуць ці жылі побач, пра сціплых людзей працы. Яна ўмее раскрыць грані кожнага свайго героя. Заўсёды сачу за публікацыямі ў газеце “Светлы шлях” і з асаблівай асалодай чытаю артыкулы Галіны Францішкаўны, яны пранікаюць прама ў сэрца і цешаць душу. Кожнаму чалавеку ёсць пра што расказаць, і добра, што ёсць такія творцы, якія могуць усё гэта перадаць на паперы.
Ірына Гаева:
– Дзякую гэтай творчай жанчыне, якая намалявала партрэты нашых землякоў. Дзякую мужу, які падтрымлівае ўсе яе пачынанні.
Пра побыт і лёс землякоў,
Галіна шмат кніг выдавала.
Падзякаваць кожны гатоў
за ўсё, што яна напісала.
– Мяне дзівіць, як Вы пішаце пра людзей. Такое ўражанне, што Вы знаходзіце ўнутранае святло, якое яны выпраменьваюць. Пра Вас ведаю па артыкулам мясцовай газеты і па кнігам, якія Вы выпусцілі. Імкнуся хадзіць на ўсе прэзентацыі Вашых кніг. Не спыняйцеся, творчых поспехаў і няхай Бог Вас накіроўвае.
Галіна Антонава падарыла раённай бібліятэцы і гісторыка-краязнаўчаму музею па экзэмпляру новай кнігі. Прыходзьце і чытайце "Космас Анатоля Антонава", каб пазнаёміцца са светам унікальнага таленту.
Прэзентацыя стала не толькі магчымасцю пазнаёміцца з кнігай, але і сустрэчай з творчасцю, натхненнем і эмоцыямі.
Ларыса Татарынава
Фота аўтара
