У Смаргоні адбыўся канцэрт у гонар Святой Цэцыліі
Культура
25.11.2019
24 лістапада ў парафіі Святога Міхаіла Арханёла адбыўся традыцыйны канцэрт у гонар Святой Цэцыліі, апякункі касцёльнай музыкі і музыкантаў. “Цэцыліяда-2019” праходзіла пад назвай “Хрыстос гаспадар, валадар дому”.
У маладзёжным каталіцкім цэнтры спявалі, гралі на музычных інструментах, танцавалі. 23 разнапланавыя нумары – песні на рэлігійную тэматыку, народныя і нават сучасныя папулярныя песні. Сольнае выкананне, дзіцячы і дарослыя хоры. Сярод выступоўцаў - парафіяльная моладзевая група Piligrims, члены Савіо-клуба, аніматары, танцавальныя калектывы “Мішутка” і “Маладосць душы”, выхаванцы школы мастацтваў імя М.К. Агінскага…
Напрыканцы свята ўсе ўдзельнікі сабраліся разам на адной сцэне і заспявалі гімн араторыя. А пасля кожны атрымаў невялічкі сувенір на памяць. Па добрай салезіанскай традыцыі пробашч парафіі Алег Жураўскі прамовіў да ўсіх слоўка на добрую ноч.
Галіна АНТОНАВА.
Фота аўтара.
