Унучкі Якуба Коласа завіталі ў Слонім на Коласаўскія чытанні
Культура
31.08.2019
Коласаўскія чытанні, прысвечаныя Дню беларускага пісьменства і 75-годдзю з Дня заснавання Слонімскай раённай бібліятэкі імя Якуба Коласа адбыліся ў Слоніме.
У раённым цэнтры творчасці дзяцей і моладзі сабраліся супрацоўнікі Нацыянальнай бібліятэкі Беларусі, абласной навуковай бібліятэкі імя Я. Ф. Карскага, навукоўцы, краязнаўцы, пісьменнікі і паэты…
Ганаровымі гасцямі імпрэзы сталі ўнучкі Якуба Коласа Вера і Марыя Міцкевічы, паведамляе "Гродзенская праўда".
Гасцей віталі намеснік дырэктара Нацыянальнай бібліятэкі Таццяна Кузьмініч, дырэктар Гродзенскай навуковай бібліятэкі імя Я. Ф. Карскага Лідзія Мальцава, начальнік аддзела культуры Слонімскага райвыканкама Галіна Данільчык.
Цікавыя аповеды прапанавалі ўнучкі песняра. Вера Міцкевіч расказала пра род Каменскіх у жыцці Якуба Коласа. Марыя Міцкевіч – пра рарытэты, якія захоўваюцца ў бібліятэцы імя Францыска Скарыны ў Лондане. Нашчадкі паэта падарылі Слонімскай бібліятэцы кнігі і кампакт-дыскі.
Галоўны рэдактар часопіса “Беларуская мова і літаратура”, прафесар, БДУ Алесь Бельскі правёў прэзентацыю кнігі пра Алега Лойку, вядомага паэта, літаратуразнаўцу, якога нарадзіла Слонімская зямля.
