Суботнік каля Крэўскага замка: рака Крэўлянка папрыгажэла

Сярод удзельнікаў суботніка – старшыня райвыканкама Генадзь Харужык. 

“Праводзіць суботнікі  стала добрай традыцыяй, - заўважыў Генадзь Васільевіч. – Сёння мы працуем каля Крэўскага замку – гісторыка-культурнай каштоўнасці Беларусі. Пачынаючы з 2017 года тут праходзяць маштабныя ўзнаўляльныя работы, сюды актыўна прыязджаюць турысты. Сёння разам мы робім добрую справу: прыводзім у парадак тэрыторыю каля замка. Надвор’е цудоўнае, настрой – таксама”.

“Сабралася больш за 40 чалавек, гэта работнікі райвыканкама, раённага адзела міністэрства па надзвычайных сітуацыях, - адзначыў старшыня Крэўскага сельвыканкама Віктар Дзятчык. - Работы па навядзенні парадку  вакол Крэўскага замка заўсёды хапае, нам такая дапамога вельмі патрэбная”.

Як адзначыла начальнік аддзела культуры Смаргонскага райвыканкама Таццяна Ражэва, у справе захавання і папулярызацыі гістарычных аб’ектаў - важная сумесная праца дзяржаўных органаў, краязнаўцаў, валанцёраў, прадстаўнікоў прыватнага бізнесу. Толькі разам, па старадаўняй беларускай традыцыі, “талакой”,  можна дасягнуць добрага выніку.

Гэта акцыя – першая ў шэрагу мерапрыемстваў па добраўпарадкаванні гістарычнага мястэчка, якія запланаваны на сёлетні год. У працяг актыўнасці стартуе праект KREVA прыклад дзяржаўна-прыватнага супрацоўніцтва. Яго каманда вырашыла стварыць  інтэграваную сістэму, якая ўключае ў сабе як візуальную частку: знакі, інфастэнды, лакацыі, малыя архітэктурныя формы на мясцовасці, так і мабільнае прыкладанне, якое стварае дапоўненую рэальнасць і дазваляе турысту выбраць найлепшы фармат адпачынку.

Каардынатар праекта KREVA Аляксандр Варыкіш упэўнены: “Крэва мае велічэзны патэнцыял. Мы імкнёмся да таго, каб цэнтр тысячагадовага рэгіёну з багатай гісторыяй і культурай стаў, кажучы па-моднаму, турыстычным хабам, што аб’яднае розныя аб’екты, маршруты, сэрвісы, якія дапамогуць раскрыць шматгранную гісторыю краю”.

Галіна АНТОНАВА.

Фота аўтара.