Елачная казка

Здаецца, горад вырашыў выйграць першынства па колькасці елак. Зялёныя прыгажуні паўсюль: на плошчах, у парках, каля сцыяльна значных аб’ектаў і  крам.

Але асаблівай арыгінальнасцю вылучаецца парк Жэлібера. Каля ўваходу цябе сустракаюць казачныя дрэвы-волаты, упрыгожаныя неонавай ілюмінацыяй.

А далей ты трапляеш на алею елак, створаных мясцовымі прадпрыемствамі і навучальнымі ўстановамі. Прывабна зіхаціць елка, створаная з  электрычных лямпачак, ад РУП “Гроднаэнерга”. Здзіўляе халодным хараством і стрыманасцю зробленая са штучных нітак елка ад філіяла “Завод  Хімвалакно” ААТ “Гродна Азот”. А награвальная  спіраль  аказваецца можа быць і гірляндай для лясной прыгажуні! З рознакаляровых бутэлек таксама можна стварыць елку! А вось елка ад ААТ “Аўтобусны парк г. Гродна”, на мой погляд,  выглядае самай арыгінальнай. Аснову елкі складаюць пафарбаваныя ў зялёны колер шыны, замест гірлянд—ланцужкі, а ў якасці елачных цацак—дарожныя знакі і шарыкі з назвамі гарадоў Гродзенскай вобласці і колькасцю кіламетраў да іх.

Хочацца верыць, што Гродна перадасць эстафету раённым цэнтрам і ў наступным годзе мы  таксама будзем мець магчымасць апынуцца ў елачнай казцы!

Наталля СІДАРАВА.