«Прыйшоў, убачыў, перамог» - Ведай нашых - Спорт - Навіны Смаргоншчыны - Газета Светлы шлях

Мацнейшыя шахматысты Смаргоні, прызёры першынства горада (злева направа) Пётр ГАЎРОШ (2-е месца), Юрый РУДЫ (1-е месца), Сяргей ПУЗЫНА (3-е месца).

Такімі словамі старажытнарымскага палкаводца можна адзначыць бліскучую перамогу Юрыя Рудога на першынстве горада па шахматах. Ён набраў 15 з паловай ачкоў з 16 магчымых, саступіўшы гэтую палову Пятру Гаўрошу, і стаў у чацвёрты раз чэмпіёнам горада.
Прыемна сказаць колькі слоў пра Юру. Ён 1990 года нараджэння, студэнт 4 курса Беларускага дзяржаўнага ўніверсітэта інфарматыкі і радыёэлектронікі. Сціплы, старанны юнак. Выхаванец смаргонскай шахматнай школы. Кандыдат у майстры спорту. А любоў да шахмат прывілі яму ў сям’і. Бацька Уладзімір Аляксандравіч мае другі спартыўны разрад, пастаянны ўдзельнік усіх шахматных спаборніцтваў, у тым ліку і гэтага першынства. Маці Зоя Мікалаеўна таксама сур’ёзна захапляецца гульнёй і, дарэчы, тыдзень таму атрымала першы прыз у спаборніцтвах па шахматах сярод жанчын на раённай спартакіядзе.
Сваёй перамогай Юрый Руды пацясніў на другое месца неаднаразовага чэмпіёна горада Пятра Гаўроша. Трэцім, як і летась, стаў Сяргей Пузына.
Пацвердзілі нарматывы першаразраднікаў Антон Татарынаў, Валерый Аніська і Валерый Зінчанка.
Ва ўрачыстай абстаноўцы начальнік аддзела фізкультуры, спорту і турызму райвыканкама Аляксандр Лобан уручыў прызёрам граматы, медалі і грашовыя ўзнагароды. Дарэчы, ніхто з удзельнікаў першынства не застаўся без увагі і кожны атрымаў маральнае і матэрыяльнае заахвочванне.
Наперадзе – навагоднія і калядныя турніры, спаборніцтвы, прысвечаныя Дню абаронцаў Айчыны і Дню жанчын 8 Сакавіка, а то і проста турніры выхаднога дня. Запрашаем усіх аматараў шахмат прыходзіць да нас у "Шахматны клуб” – тут прыемна і карысна правядзеце вы свой вольны час.

Іван ШЧУРОЎСКІ, старшыня грамадскага аб’яднання "Шахматны клуб”.
Фота Зоі РУДОЙ.

Программа от 16.05.12