 За шматгадовую плённую працу,
асабісты ўклад у падрыхтоўку спартсменаў высокага класа дырэктар
Смаргонскай СДЮШАР Валерый ЮРЧАНКА ўзнагароджаны Ганаровай
граматай Гродзенскага абласнога выканаўчага камітэта.
Прыемна павіншаваць нашага земляка Валерыя Юрчанку і
яшчэ з адной чарговай высокай узнагародай. На гэты раз – спецыяльны прыз
"Журналісцкая спартыўная сімпатыя”, які ўпершыню ўручаўся ў нашай
вобласці.
Напачатку снежня ўсе рэдакцыі Гродзеншчыны даслалі ў аддзел ідэалогіі аблвыканкама прозвішчы тых спартсменаў, якіх яны палічылі найбольш вартымі гэтага прыза. Вельмі ганарова для нас, што менавіта выбар "Светлага шляху” супаў з меркаваннем камісіі, і гэты вядомы не толькі ў нашым горадзе чалавек аказаўся ў ліку пяці ўзнагароджаных (сярод якіх яшчэ адзін трэнер і трое тытулаваных спартсменаў). Допісы Валерыя Антонавіча пасля рознага кшталту спаборніцтваў неаднаразова публікаваліся на старонках газеты. А калі важныя спартыўныя мерапрыемствы праходзяць у нашым горадзе, то карэспандэнты "Светлага шляху” – заўсёды жаданыя госці на іх.
Акрамя таго, што ўжо шмат гадоў Валерый Юрчанка ўзначальвае нашу спартыўную дзіцяча-юнацкую школу алімпійскага рэзерву, ён з’яўляецца і трэнерам зборнай Беларусі дзяўчат да 16 гадоў па баскетболу. Дзякуючы яму, у Беларусі загаварылі пра смаргонскую школу баскетбола, яго выхаванкі часта не пакідаюць саперніцам шанцаў на спаборніцтвах самага высокага класа. І вельмі ў многім гэта заслуга трэнера, які здольны ўсяліць у іх дух перамогі і падтрымаць належны настрой.
Віялета ВОЙТКА.
Фота Міхаіла РАЗУМНІКА.
| 
Навігацыя
