Да новых сустрэч, Станчыненты! - Свята - Сельскае жыццё і экалогія - Навіны Смаргоншчыны - Газета Светлы шлях

Зофія ПЛОСКАЯ з Лылойцяў вітае жыхароў Станчынентаў.

Колькі вёсачак такіх, што з карт знікаюць!
Іх знішчаюць нашы дзеянні і час.
Толькі ў снах яны нанова ажываюць,
Ды, як маці ціха моляцца за нас…
Вёска Станчыненты Лылойцінскага сельскага Савета невялічкая, малавядомая. Тут засталіся апошнім часам адны пенсіянеры, таму мерапрыемства, наладжанае культработнікамі і самадзейнымі артыстамі Лылойцінскага цэнтральнага Дома культуры, стала для іх сапраўды важнай і прыемнай падзеяй. Яшчэ здалёк пачулі вяскоўцы звон шастуноў, якія ганарова несла на сваёй шыі святочна прыбраная кабылка. На спецыяльна падрыхтаванай пляцоўцы сабраліся ўсе жыхары Станчынентаў, каб паглядзець і паслухаць выступленні ўдзельнікаў канцэрта.
Вядучая свята, настаўніца матэматыкі Сыраваткінскай школы Галіна Свірская, расказала пра гісторыю вёскі. З добрымі словамі выступіла старшыня Лылойцінскага сельскага Савета Святлана Кучарава. Затым з канцэртнымі нумарамі выступілі ўдзельнікі мастацкай самадзейнасці Лылойцінскага Дома культуры, якія радавалі гледачоў лірычнымі спевамі. Гарачымі апладысментамі сустракалі прысутныя выступленне фальклорнага гурта "Спадарыня”. З музычнымі падарункамі перад вяскоўцамі выступілі Марына Капач, Валянціна Дамуць, Яўгенія Кот, Алена Дамуць, Зофія Плоская, Яніна Грынцэвіч. А на белым абрусе стала апетытна цешылі вока розныя стравы, прыгатаваныя клапатлівымі рукамі вясковых гаспадынь.
Вельмі не хацелася пакідаць гэту вёсачку і яе добразычлівых жыхароў, таму дамовіліся сустрэцца яшчэ праз год. Магчыма, яна і не знікне, як многія ёй падобныя, з карты раёна.

Алена СУЛЬЖЫЦКАЯ.

Программа от 16.05.12