Гарбузы для Папялушкі - Дары прыроды - Сельскае жыццё і экалогія - Навіны Смаргоншчыны - Газета Светлы шлях

Вось такія казачна вялікія гарбузы выраслі сёлета на агародзе ў Канстанціна Юхневіча. Чаму казачна? Бо як у той гісторыі з рэпкай: вырасла такая вялікая, што не выцягнуць! А ў дадзеным выпадку: такія вялікія, што не пацягнуць. І калі аднаго на карэту для Папялушкі малавата, то з трох, пастараўшыся, можна і змайстраваць.
Купіўшы насенне, Канстанцін Іванавіч ніяк не мог меркаваць, што гарбузы будуць такімі вялікімі, таму і пасеяў не каля хаты, а на дадатковым агародзе, што воддаль ад дома. Відаць і глеба, і надвор’е даспадобы аказаліся гэтай культуры, таму і павырасталі плады надзвычай вялікімі. Да таго ж яшчэ і вогненна-яркімі – здалёку прыцягваць погляд прахожых і праязджаючых па вуліцы Асланава. Між іншым, стравы з гарбуза вельмі карысныя для здароўя, асабліва суп-пюрэ. У асобных краінах Еўропы ў гарбузовы суп дадаюць апельсінавы сок і засмажаныя на алеі лушчаныя семачкі. У нашай краіне традыцыйна рыхтуюць гарбузовую кашу, хто з пшонкай, хто з аўсянкай. Сям’і Юхневічаў гарбузоў і семак надоўга хопіць.

Фота Алы СТРАШЫНСКАЙ.

Программа от 16.05.12