Захаваць гістарычную спадчыну - На кантроле - Сацыяльна-эканамічныя праблемы - Навіны Смаргоншчыны - Газета Светлы шлях

Чарговае пасяджэнне міжведамаснага каардынацыйнага савета па захаванні гісторыка-культурнай спадчыны было прысвечана падвядзенню вынікаў мінулага года і зацверджэнню плана работы на 2012 год.
Са справаздачай выступіла метадыст метадычнага цэнтра народнай творчасці Таццяна Касцюшэўская. Яна адзначыла, што пастаянна ў полі зроку ўсіх зацікаўленых і адказных службаў аб’екты і помнікі, занесеныя ў спіс каштоўнасцей рэспубліканскага і мясцовага маштабу. На працягу мінулага года праводзілася мэтанакіраваная работа па заключэнні пагадненняў з усімі ўласнікамі культавых будынкаў і тэрыторый, на якіх размешчаны аб’екты архітэктуры і археалогіі. Навуковыя пашпарты і ўліковыя карткі заведзены на ўсе помнікі старажытнасці. Узнікаюць часам пытанні з вызначэннем ахоўваемых зон і стварэннем адпаведных праектаў. Тым не менш, працэдуры выконваюцца і дакументы афармляюцца належным чынам. Шмат зроблена музеем і іншымі ўстановамі культуры для папулярызацыі гістарычных помнікаў і наогул гісторыі роднага краю.
Работа каардынацыйнага савета прызнана здавальняючай. На год бягучы першачарговымі задачамі вызначаны вывучэнне стану помнікаў ваенна-гістарычнай спадчыны, правядзенне маніторынгу з наведваннем культавых устаноў і аб’ектаў манументальна-дэкаратыўнага мастацтва. На працягу першага квартала аддзелам архітэктуры і горадабудаўніцтва павінны быць праведзены мерапрыемствы па інвентарызацыі аб’ектаў манумантальнага мастацтва. Аддзелу ідэалагічнай работы даручана здзейсніць планавы аб’езд ваенных помнікаў і зрабіць высновы па іх утрыманні ўласнікам. Дарэчы, уласнікі (у дадзеным выпадку сельскія выканаўчыя камітэты) павінны мець копіі ўліковых дакументаў на гістарычныя каштоўнасці, што знаходзяцца на іх тэрыторыях.

Ала КЛЕМЯНОК.

Программа от 16.05.12