Свята снежнае и завейнае - Звонкае рэха падзеі - Культура, мараль і права - Навіны Смаргоншчыны - Газета Светлы шлях

Сваё зімовае свята - Сусветны дзень снегу - прырода адсвяткавала ў нашым раёне снегападам і завеяй. Але гэта не перашкодзіла спартсменам, прафесіяналам і аматарам, сабрацца разам на ўжо абкатанай лыжні ў парку "Перамогі”.

Паўдзельнічаць у лыжнай гонцы вырашыў і 72-гадовы Станіслаў ПАЛАНЕВІЧ з дачкой Вольгай.

Як адзначыў намеснік старшыні райвыканкама Генадзь Бычко, інтрыга гэтага мерапрыемства ў тым, што мы да апошняга не ведалі, ці адбудзецца яно: якое ж свята снегу без снегу? Але прырода не падвяла. На думку Генадзя Паўлавіча, пытанне аб актуальнасці такіх агульнараённых спартыўных свят нават стаяць не павінна, гэта ж здароўе кожнага чалавека. І сам ён рады пракаціцца з вецярком на лыжах, таму з задавальненнем прыняў прапанову выступіць за каманду райвыканкама.
Першымі трасу апрабавалі школьнікі ў эстафеце 4х1000. Не першы год заўважаю, што ў зімовых відах спорту ўпэўненае лідарства трымаюць сельскія школьнікі. Вось і на гэты раз з першага ж этапу эстафеты наперад вырвалася каманда Сольскай школы. І сваю перавагу ўжо нікому не аддала - скончыла эстафету таксама першай. Літаральна ў спіну дыхалі сольскім спартсменам лыжнікі з Крэва і Бялкоўшчыны. Яны і занялі другое і трэцяе месцы адпаведна.
Дарослая эстафета прынесла адразу некалькі сюрпрызаў. На першым этапе, які беглі жанчыны, амаль плячом да пляча фінішыравалі каманды РАУС і ўпраўлення адукацыі райвыканкама, спартсменка з каманды міліцыі была трошкі хутчэйшай за сваю саперніцу. Але ўжо на другім этапе каманда педагогаў выхапіла лідарства і трымала яго да самага фінішу. А вось міліцыянеры не трапілі нават у тройку прызёраў. На другім месцы фінішыравалі вайскоўцы з в/ч 2044, на трэцім - супрацоўнікі Інстытута пагранічнай службы.
Дарэчы, і ў індывідуальнай гонцы вайскоўцы паказалі сябе з найлепшага боку. Праўда, у жаночым забегу лепшай не ўпершыню стала настаўніца фізкультуры школы №7 Ганна Страшкевіч. Але на другім месцы - Дзіяна Пракапчук (в/ч 2044), на трэцім - Кацярына Юдзіна (Інстытут пагранічнай службы). А ў мужчын увогуле вайскоўцы занялі ўвесь п’едэстал гонару: на першым месцы Дзяніс Бахтаў (Інстытут пагранічнай службы), на другім і трэцім адпаведна - Аляксей Роўда і Віталь Лінга (в/ч 2044).
"Снежнае” свята праляцела хутка. Усе вярнуліся да будзённых спраў, але лыжы абяцалі не хаваць далёка: наперадзе яшчэ столькі марозных дзён. А напрыканцы лютага на гэтым жа самым месцы яшчэ больш спартсменаў збярэ "Смаргонская лыжня”. Спадзяёмся, прырода нам гэта дазволіць.

Віялета ВОЙТКА.
Фота Міхаіла РАЗУМНІКА.

Программа от 16.05.12