Аднойчы, праз 20 год - Сустрэчы - Культура, мараль і права - Навіны Смаргоншчыны - Газета Светлы шлях

А з чым у вас асацыіруецца паняцце школа? Якія эмоцыі выклікае гэта слова? Мяркую, што ў выпускнікоў, якія не забываюцца наведвацца ў родныя "пенаты”, асабліва ў першую суботу лютага, эмоцыі выключна станоўчыя.
Выпускнік 1992 года СШ №5 Віталь Бутрым, саветнік-кансультант Генеральнага сакратарыяту Савета Бяспекі пры Прэзідэнце Рэспублікі Беларусь, з вялікай удзячнасцю ўспамінае сваіх школьных настаўнікаў, сяброў, класнага кіраўніка Тамару Віктараўну Міронаву. А Тамара Віктараўна з вялікім захапленнем гатова расказваць пра свой незабыўны клас выпуску 1992. Адзначыць 20-годдзе сабраліся на традыцыйны вечар у родную школу яе былыя вучні. Па шчырым прызнанні настаўніцы і класнага кіраўніка, на ўрокі англійскай мовы ў гэты клас яна ішла, як на свята. Яны ж, як пра свята, успамінаюць пра школьныя гады.
Клас гэты насамрэч вызначаўся адказнасцю, працаздольнасцю, творчым запалам. Эрудыты, інтэлектуалы – яны перамагалі на алімпіядах, у разнастайных конкурсах. Прызёрамі і пераможцамі прадметных алімпіяд былі Марына Ахрэм, Юлія Плешакова, Наталля Кажарновіч, Інга Нікалаева, Мікалай Пундзік. Большасць выпускнікоў маюць вышэйшую адукацыю, астатнія – сярэднюю спецыяльную. У юбілейны год свайго выпуску на сустрэчу прыехалі інжынеры, высокакваліфікаваныя рабочыя, банкаўскія і медыцынскія работнікі, перакладчыкі, педагогі, інжынеры, камерцыйныя дырэктары. Яны ўсе адбыліся як асобы, як прафесіяналы, іх праца запатрабаваная, а яны маюць цвёрды падмурак пад нагамі, пачатак якому закладзены ў роднай школе.
Шчаслівыя моманты прыгадвалі на сустрэчы. Гэта і турыстычныя паходы ў горы, і касцюміраваныя святы Новага года, і гумарыстычная конкурсы, і проста цікавыя і шчаслівыя моманты свайго дзяцінства і юнацтва.

Ала КЛЕМЯНОК.

Программа от 16.05.12