У турме - не мёд - Прафілактыка - Крымінал - Навіны Смаргоншчыны - Газета Светлы шлях

Сёлета ў райаддзеле міліцыі прайшло першае пашыранае пасяджэнне савета грамадскіх пунктаў аховы парадку Цэнтральнага, Заводскага і Усходняга мікрараёнаў. У ім прынялі ўдзел намеснік старшыні райвыканкама Генадзь Бычко, намеснік пракурора раёна Мікалай Кіндра, старшыня савета грамадскага пункта аховы парадку мікрараёна Цэнтральны Алена Атцэцкая, участковыя інспектары міліцыі, іншыя службовыя асобы.
У зале знаходзіліся людзі, якія не ў ладах з законам. Некаторыя з іх пачалі выпраўляцца. Паспрыяла гэтаму міліцэйская прафілактычная работа. Іншых прыйшлося строга папярэдзіць: за парушэнне грамадскага парадку прадугледжана адміністрацыйная адказнасць. Летась было ўзбуджана 20 крымінальных спраў за ўчыненне злачынстваў у сямейна-бытавой сферы. Часцей за ўсё канфлікты адбываюцца, калі людзі знаходзяцца ў стане алкагольнага ап’янення альбо разам распіваюць спіртныя напіткі.
У далейшым пасяджэнні савета грамадскіх пунктаў аховы парадку плануецца праводзіць не радзей аднаго раза ў два месяцы. Матэрыялы будуць разглядацца па кожнай нядобранадзейнай сям’і і прымацца адпаведныя меры ўздзеяння да вінаватых. На мінулагоднім снежаньскім пасяджэнні савета схільным да злоўжывання спіртнымі напіткамі людзям парэкамендавалі звярнуцца ў наркалагічны кабінет, прайсці курс лячэння. Супрацоўнікі міліцыі дапамагаюць сваім падапечным і ў працаўладкаванні. Вядома ж, пры садзейнічанні мясцовай службы занятасці насельніцтва.
Начальнік крымінальна-выканаўчай інспекцыі Віктар Сульжыцкі папярэдзіў катэгорыю асоб, якія былі раней судзімыя альбо адбываюць пакаранне па месцы жыхарства і стаяць на ўліку ў міліцыі. Асацыяльныя паводзіны ні да чаго добрага не прывядуць, хіба што да турмы. Таму лепш узяцца за розум і пачаць новае жыццё, каб не мець у далейшым праблем з законам.
Далей былі разгледжаны выпадкі правапарушэнняў, заслуханы вінаватыя асобы.

Ягор КАРЫЦКІ.

Программа от 16.05.12