Беспрацоўны і пад "градусам” жыхар вёскі Вайнідзеняты ўгнаў у пасёлку Свір аўтамабіль "Сітраэн”. Гаспадар іншамаркі звярнуўся па дапамогу ў міліцыю. Быў уведзены план "Перахват”. Супрацоўнікі смаргонскай ДАІ затрымалі аўтамабіль непадалёку ад вёскі Завелле.
Узбуджана крымінальная справа.
*       *       *
Узбуджана крымінальная справа супраць жыхара Маладзечна, які ехаў на мапедзе па Крэве і наскочыў на бардзюрны камень. Пасажыр упаў і атрымаў цяжкія цялесныя траўмы. Вадзіцель мапеда з месца ДТЗ знік, пакінуўшы пацярпелага ў небяспечным стане.
*       *       *
З нежылога дома ў вёсцы Навасёлкі былі ўкрадзены электрычны прас, электрычны чайнік, пара мужчынскіх туфляў, сталовыя прыборы, інструменты і дзве ручныя машынкі для стрыжкі валасоў.
*       *       *
Жыхар Мядзельскага раёна пасля сумеснага распіцця спіртных напіткаў са знаёмым з Солаў адкрыта выцягнуў у апошняга з кішэні 200 тысяч рублёў.
Пацярпеламу нічога не заставалася, як звярнуцца па дапамогу ў міліцыю.
*       *       *
Двое жыхароў Смаргоні 1965 і 1976 гадоў нараджэння, заходзячыся на тэрыторыі дрэваапрацоўчага прадпрыемства, укралі бензапілу і электрарубанак агульным коштам 3 мільёны 402 тысячы рублёў.
*       *       *
31-гадовы гараджанін наведаўся ў залу гульнёвых аўтаматаў, якая размешчана ў будынку рэстарана "Вілія”, і ўкраў адтуль пакінуты без нагляду ноўтбук, які належаў мясцоваму жыхару.
*       *       *
З магазіна ў вёсцы Сівіца, які належыць райспажыўтаварыству, былі ўкрадзены вінна-гарэлачныя, тытунёвыя і кандытарскія вырабы, харчовыя прадукты, парфума, 30 пар шкарпэтак і грашовая выручка (каля 20 тысяч рублёў). Усяго на 7 мільёнаў 489 тысяч 865 рублёў.
Узбуджана крымінальная справа.