У Смаргоні з аўтамабіля "Форд”, які стаяў у Абразцовым завулку каля будуемага катэджа і быў незамкнёны, нехта ўкраў перфаратар, электра- і бензапілы. Пры дапамозе гэтых інструментаў уладальнік іншамаркі аказваў паслугі па розных відах работ.
*       *       *
Мясцовы жыхар вярнуўся дамоў з рэстарана. Паміж ім і жонкаю адбылася сварка, падчас якой жанчыне былі нанесены два нажавыя ўдары ў грудзі.
Пазней высветлілася, што не толькі муж, але і жонка была нападпітку. Таму гэтыя людзі не змаглі патлумачыць супрацоўнікам міліцыі з-за чаго адбыўся канфлікт.
*       *       *
У міліцыю звярнуўся гаспадар аўтамабіля "Рэно”. З салона іншамаркі прапалі электрапомпа "Тайфун”, 5 літраў масла для дызельнага рухавіка, 20 літраў саляркі і ўніверсальны складны нож.
*       *       *
Смаргонец 1982 года нараджэння распіваў спіртныя напіткі ў кватэры дома па вуліцы Юбілейнай, а потым украў лічбавы фотаапарат.
*       *       *
Каля вёскі Залессе супрацоўнікі ДАІ спынілі аўтамабіль, за рулём якога знаходзіўся жыхар Маладзечна. У салоне легкавушкі мужчына перавозіў 190 літраў паліва без адпаведных дакументаў.
На парушальніка складзены адміністрацыйны пратакол.
*       *       *
Жыхар Смаргоні 1962 года нараджэння знаходзіўся вечарам у кватэры дома па вуліцы Савецкай. Пасля таго, як мужчына пакінуў жыллё, гаспадары не далічыліся 150 тысяч рублёў.
*       *       *
Дзяржаўтаінспектары "адпрацоўвалі” мясцовасць каля вёскі Мілэйкава. Спынілі "Опель”, праверылі дакументы ў вадзіцеля. Потым агледзелі аўтамабіль і знайшлі 50 літраў самагону. Яго перавозіў жыхар вёскі Брылькі Валожынскага раёна.
А маладзечанец, якога супрацоўнікі ДАІ спынілі каля Алянца, вёз у аўтамабілі 105 літраў "сівухі”.